Ж.Тәшеновтың жүлдесі үшін жасөспірімдер арасында тоғызқұмалақтан қалалық турнир басталды

×

Бүгін Ақтөбе қаласындағы №68 орта мектепте мемлекет және қоғам қайраткері Жұмабек Тәшеновтың жүлдесі үшін жасөспірімдер арасында тоғызқұмалақтан қалалық турнир басталды. Ақтөбе қалалық дене тәрбиесі мен «Спорт жұлдыздары» республикалық журналы және №68 орта мектеп бірлесіп өткізген шараға 20 команда сапында 100-ге жуық жас тоғызқұмалақшы қатысып, Алаш қайраткерінің жүлдесін өзара сарапқа салды.

Турнирдің ашылу салтанатында «Спорт жұлдыздары» республикалық журналының бас редакторы Мусағали Тасқалиев және №68 орта мектеп директоры Сұлушаш Сүндетбаевалар құттықтау сөз сөйлеп, жарысқа қатысушыларға сәттілік тіледі. Тоғызқұмалақтан ҚР еңбек сіңірген жаттықтырушы Қабидолла Нұршин ағамыздың жетекшілігімен төрешілер алқасы кешкісін турнир мықтыларын анықтайтын болады. Жеңімпаздар мен жүлдегерлердің барлығына ұйымдастырушылар тарапынан кубоктар мен дипломдар табыс етіледі.